jeudi 3 mai 2012

Ballade du concours de Blois François Villon ( Poème )






Porc-épic emblème de Louis XII



                                                 Ballade du Concours de Blois


            Je meurs de seuf auprès de la fontaine
            Chault comme feu, et tremble dent a dent
            En mon païs suis en terre loingtaine ;
            Lez ung brasier frissonne tout ardent ;
            Nu comme ung ver, vestu en president,
            Je ris en pleurs et attens sans espoir ;
            Confort reprens en triste desespoir :
            Je m'esjouïs et n'ay plaisir aucun ;
            Puissant je suis sans force et sans povoir,
            Bien recueully, débouté de chascun.

            Rien ne m'est seur que la chose incertaine ;
            Obscur, fors ce qui est tout evident ;
            Doubt ne fais, fors en chose certaine ;
            Science tiens a soudain accident,
            Je gaigne tout et demeure perdent :
            Au point du jour dis  : " Dieu vous doint bon soir ! "

            Gisant envers, j'ay grant paour de cheoir ;
            J'ay bien de quoy et si n'en ay pas ung ;
            Eschoitte attens et d'omme ne suis hoir,
            Bien recueully, debouté de chascun.

            De rien n'ay soing, si mectz toute ma peine,
            D'acquerir biens et n'y suis pretendent ;
            Qui mieulx me dit, c'est cil qui plus m'attaine,
            Et qui plus vray, lors plus me va bourdent ;
            Mon amy est, qui me fait entendent
            D'ung cigne blanc que c'est ung corbeau noir ;
            Et qui me muyst, croy qu'il m'ayde a povoir ;
            Bourde, verté, au jour d'uy m'est tout un ;
            Je retiens tout, rien ne sçay concepvoir,
            Bien recueully, debouté de chascun.

            Prince clement, or vous plaise sçavoir
            Que j'entens moult et n'ay sens ne sçavoir ;
            Parcial suis, a toutes loys commun,
            Que fais-je plus ? Quoy ? Les gaiges ravoir,
            Bien recueully, debouté de chascun


                                                                                                  François Villon

           

Aucun commentaire:

Enregistrer un commentaire